కత్తిపోట్లతో రక్తమోడినా.. 174 మందిని కాపాడిన భారత పైలట్!

న్యూఢిల్లీ: దుబాయ్‌ నుంచి ఇజ్రాయెల్‌లోని టెల్‌అవీవ్‌కు వెళ్తున్న ఫ్లైదుబాయ్‌ విమానంలో బుధవారం తీవ్ర ఉద్రిక్త పరిస్థితి నెలకొంది. బోయింగ్‌ 737 మ్యాక్స్‌8లో కెప్టెన్‌ స్మిత్‌ మచార్‌పై కో-పైలట్‌ కత్తితో దాడి చేసినట్లు అధికారులు, పలు అంతర్జాతీయ మీడియా కథనాలు వెల్లడించాయి. తీవ్రంగా గాయపడినప్పటికీ మచార్‌ కాక్‌పిట్‌ తలుపును తెరిచేందుకు వీలుగా వ్యవహరించడంతో ప్రయాణికులు, సిబ్బంది లోపలికి చేరుకున్నారు. కో-పైలట్‌ను అదుపులోకి తీసుకున్న అనంతరం విమానంలో ఉన్న మరో ఇద్దరు పైలట్లు నియంత్రణ చేపట్టారు. ఈ సమయంలో విమానం సుమారు 14 వేల అడుగుల మేర వేగంగా కిందికి దిగినట్లు ప్రాథమిక సమాచారం. అనంతరం విమానాన్ని సౌదీ అరేబియాలోని తబూక్‌ విమానాశ్రయంలో సురక్షితంగా దించారు. విమానంలో ఉన్న 174 మంది ప్రయాణికులు, సిబ్బంది ప్రాణాలతో బయటపడ్డారు.

నెతన్యాహు ప్రశంసలు

భారత కెప్టెన్‌ చూపిన ధైర్యాన్ని ఇజ్రాయెల్‌ ప్రధాని బెంజమిన్‌ నెతన్యాహు ప్రశంసించారు. గాయపడినా పోరాడి కాక్‌పిట్‌ తలుపు తెరిచి ప్రయాణికులు, సిబ్బందికి లోపలికి వచ్చే అవకాశం కల్పించారని పేర్కొంటూ ఆయనకు సెల్యూట్‌ చేశారు. అమెరికా అధ్యక్షుడు డొనాల్డ్‌ ట్రంప్‌ కూడా మచార్‌ను ‘రియల్‌ హీరో’గా అభివర్ణించినట్లు భారతీయ మీడియా నివేదించింది.

ఎవరీ స్మిత్‌ మచార్‌?

స్మిత్‌ మచార్‌ భారతీయ పైలట్‌. 2022 జూన్‌లో ఫ్లైదుబాయ్‌లో కెప్టెన్‌గా చేరకముందు సుమారు 11 సంవత్సరాలు స్పైస్‌జెట్‌లో పనిచేసినట్లు నివేదికలు చెబుతున్నాయి. బోయింగ్‌ 737 సిరీస్‌ విమానాల్లో ఆయనకు విస్తృత అనుభవం ఉందని, 9,750 గంటలకు పైగా విమాన ప్రయాణ అనుభవం ఉన్నట్లు ఆయన ప్రొఫైల్‌ ఆధారంగా వార్తలు వచ్చాయి. ప్రస్తుతం ఆయనకు చికిత్స అందుతున్నట్లు సమాచారం. ఘటనపై సౌదీ అధికారులు, సంబంధిత భద్రతా సంస్థలు దర్యాప్తు కొనసాగిస్తున్నాయి.