ఆయిల్‌ఫామ్ రైతుల మండల కమిటీ ఎన్నిక అధ్యక్షుడిగా తక్కలపల్లి సత్యనారాయణరావు ఏకగ్రీవం రైతుల సమస్యల పరిష్కారమే కమిటీ ప్రధాన లక్ష్యం

వర్ధన్నపేట, అక్టోబర్ 6:
ఆయిల్‌ఫామ్ సాగును మరింత విస్తరించి, రైతులకు మెరుగైన దిగుబడులు, ఆదాయం అందేలా సమన్వయంతో పనిచేయాలని ఆయిల్‌ఫామ్ రైతుల మండల కమిటీ నూతన సభ్యులు పేర్కొన్నారు. వర్ధన్నపేట మండలం ఇల్లంద గ్రామంలోని రైతు వేదికలో ఆయిల్‌ఫామ్ రైతుల మండల కమిటీ ఏర్పాటు సమావేశం నిర్వహించారు. ఆయిల్‌ఫామ్ జిల్లా అధ్యక్షుడు కృష్ణారెడ్డి ఆధ్వర్యంలో జరిగిన ఈ సమావేశానికి జిల్లా ఉద్యానవన శాఖ అధికారి శ్రీనివాస్‌రావు ముఖ్య అతిథిగా హాజరయ్యారు.
శాస్త్రీయ సాగుతో అధిక దిగుబడులు
సమావేశంలో ఆయిల్‌ఫామ్ సాగులో రైతులు పాటించాల్సిన శాస్త్రీయ పద్ధతులపై ఉద్యానవన శాఖ అధికారులు అవగాహన కల్పించారు. మొక్కల ఎదుగుదలకు అవసరమైన జాగ్రత్తలు, ఎరువుల వినియోగం, నీటి యాజమాన్యం, తెగుళ్ల నివారణ, మొక్కల సంరక్షణ తదితర అంశాలను వివరించారు. ఆయిల్‌ఫామ్ తోటల్లో సమయానుకూలంగా యాజమాన్య పద్ధతులు పాటిస్తే మంచి దిగుబడులు సాధించవచ్చని అధికారులు సూచించారు.
ప్రస్తుతం ఆయిల్‌ఫామ్ సాగుపై రైతుల్లో ఆసక్తి పెరుగుతున్న నేపథ్యంలో ఉద్యానవన శాఖ అందిస్తున్న సాంకేతిక సూచనలు, ప్రభుత్వ ప్రోత్సాహకాలను రైతులు సద్వినియోగం చేసుకోవాలని సూచించారు. తోటల నిర్వహణలో నిర్లక్ష్యం చేయకుండా శాస్త్రవేత్తలు, ఉద్యానవన శాఖ అధికారుల సూచనలను పాటించాలని తెలిపారు.
మండల కమిటీ ఏకగ్రీవ ఎన్నిక
అనంతరం ఆయిల్‌ఫామ్ జిల్లా అధ్యక్షుడు కృష్ణారెడ్డి ఆధ్వర్యంలో వర్ధన్నపేట మండల ఆయిల్‌ఫామ్ రైతుల కమిటీని ఏకగ్రీవంగా ఎన్నుకున్నారు. మండల కమిటీ గౌరవ అధ్యక్షుడిగా గుజ్జ గోపాల్‌రావు, అధ్యక్షుడిగా తక్కలపల్లి సత్యనారాయణరావు ఎంపికయ్యారు. ఉపాధ్యక్షులుగా జన్నపురెడ్డి సురేందర్‌రెడ్డి, బోయిన్పల్లి దేవేందర్‌రావు, పెంచాల కుమారస్వామిలను ఎన్నుకున్నారు.
ప్రధాన కార్యదర్శిగా గుజ్జ రాజేశ్వరరావు, సంయుక్త కార్యదర్శిగా పెండ్యాల బిక్షపతి, కోశాధికారిగా నాంపల్లి మల్లేశం బాధ్యతలు చేపట్టారు. కార్యవర్గ సభ్యులుగా బాషబోయిన రాజు, మునుకుంట్ల ఐలయ్య, ఎర్రం నాగరాజు, ఏలపాటి తిరుపతిరెడ్డిలను ఎంపిక చేశారు. నూతన కమిటీ సభ్యులను రైతులు అభినందించారు.