కడప: బెంగళూరుకు చెందిన వ్యవస్థీకృత ముఠాలో సభ్యులుగా అనుమానిస్తున్న కొందరు వ్యక్తులు కడపలోని రహస్య ప్రదేశంలో చిరుత, పులి చర్మాలను కొనుగోలు చేసేందుకు ప్రయత్నిస్తున్నారన్న సమాచారంతో అటవీశాఖ అధికారులు రహస్య ఆపరేషన్‌ చేపట్టారు. కర్నూలు కన్సర్వేటర్‌ మార్గదర్శకత్వంలో బద్వేల్‌ ఫారెస్ట్‌ రేంజర్‌ నయీమ్‌ నేతృత్వంలోని బృందం కొనుగోలుదారులుగా మారువేషంలో నిందితులను వెంబడించింది. బెంగళూరు నుంచి మైదుకూరు వరకు ఇద్దరు అనుమానితులను అనుసరించిన అధికారులు.. అనంతరం విక్రేత ఇంట్లో తనిఖీలు చేపట్టారు. ఈ సందర్భంగా ఒక మచ్చల జింక చర్మం, ఐదు పులి అనుకరణ చర్మాలు, 23 నకిలీ గోళ్లను స్వాధీనం చేసుకున్నారు. ఎన్‌ఎస్‌టీఆర్‌ పశువైద్య బృందం పరీక్షల్లో ఐదు చర్మాలు, గోళ్లు నకిలీవని తేలినట్లు అధికారులు తెలిపారు. ఈ కేసులో ముగ్గురిని అరెస్టు చేసి దర్యాప్తు కొనసాగిస్తున్నారు. కేసు పూర్వాపరాలపై ప్రొద్దుటూరు ఫారెస్ట్‌ రేంజర్‌ ఆధ్వర్యంలో విచారణ కొనసాగుతోంది.
