గణపయ్య వేగం గంటకు 0.67 కిలోమీటర్లే!
ఖైరతాబాద్‌ గణేష్‌ ఉత్సవాలకు ఏడు దశాబ్దాలకు పైగా చరిత్ర ఉంది. 1954లో స్వాతంత్ర్య సమరయోధుడు సింగరి శంకరయ్య ఆధ్వర్యంలో కేవలం ఒక అడుగు ఎత్తున్న విగ్రహంతో ఉత్సవాలు ప్రారంభమయ్యాయి. అనంతరం ఏటా విగ్రహం ఎత్తును పెంచుతూ వచ్చారు. 2014లో 60 అడుగులకు చేరిన విగ్రహం.. 2024లో 70 అడుగుల ఎత్తులో కొలువుదీరింది. 2025లో 69 అడుగుల విగ్రహాన్ని ఏర్పాటు చేయగా.. 2026లోనూ 69 అడుగుల ఎత్తులో గణపయ్య దర్శనమిస్తున్నాడు.
ఖైరతాబాద్‌ గణపయ్యను చూసేందుకు తెలంగాణతో పాటు తెలుగు రాష్ట్రాలు, ఇతర ప్రాంతాల నుంచి కూడా భక్తులు తరలివస్తుంటారు. భారీ విగ్రహం, ఏటా మారే రూపం, ప్రసిద్ధి చెందిన భారీ లడ్డూ ప్రసాదం ఈ ఉత్సవాలకు ప్రత్యేక గుర్తింపు తెచ్చాయి. 2019లో దాదాపు 40 లక్షల మంది భక్తులు ఖైరతాబాద్‌ గణేష్‌ను దర్శించుకున్నట్లు నమోదైంది.
4 కిలోమీటర్లకు 6 గంటలు
అనంత చతుర్దశి సందర్భంగా గణపయ్యను నిమజ్జనానికి తరలించేందుకు ప్రత్యేకంగా 26 టైర్ల భారీ టస్కర్‌ను ఉపయోగిస్తారు. ఈ వాహనం సుమారు 65 టన్నుల బరువును మోయగల సామర్థ్యం కలిగి ఉండగా.. గణపయ్య బరువు సుమారు 40 టన్నులు ఉంటుంది. ఖైరతాబాద్‌ నుంచి ట్యాంక్‌బండ్‌ వరకు సుమారు 4 కిలోమీటర్ల దూరాన్ని టస్కర్‌ దాదాపు 6 గంటల్లో పూర్తి చేస్తుంది. అంటే సగటున గంటకు కేవలం 0.67 కిలోమీటర్ల వేగం మాత్రమే!
సాధారణంగా మనిషి నడిచే వేగం కంటే కూడా తక్కువగా అనిపించే ఈ ప్రయాణం వెనుక ఎంతో జాగ్రత్త ఉంటుంది. భారీ విగ్రహం ఉండటంతో విద్యుత్‌ వైర్లు, మలుపులు, ట్రాఫిక్‌, భక్తుల రద్దీ, విగ్రహం స్థిరత్వం వంటి అంశాలను దృష్టిలో పెట్టుకుని టస్కర్‌ను అత్యంత నెమ్మదిగా నడపాల్సి ఉంటుంది.
భక్తితో ఉచిత సేవ
ఈ భారీ టస్కర్‌ను విజయవాడకు చెందిన ఎస్‌టీసీ ట్రాన్స్‌పోర్ట్‌ సంస్థ అందిస్తున్నట్లు డ్రైవర్‌ తెలిపారు. గత నాలుగేళ్లుగా వెంకటరెడ్డి ఈ టస్కర్‌ను నడుపుతున్నారు. భారీ గణపయ్యను తరలించే బాధ్యతను భక్తితో స్వీకరించిన ఆయన ఎలాంటి పారితోషికం తీసుకోకుండా సేవ చేస్తున్నట్లు తెలిపారు. డబ్బు కోసం కాకుండా గణనాథుడిపై ఉన్న భక్తితోనే ఈ సేవ చేస్తున్నానని చెప్పారు.
చిన్న విగ్రహంతో మొదలైన ఖైరతాబాద్‌ గణేష్‌ ఉత్సవాలు.. నేడు హైదరాబాద్‌ సంస్కృతిలో ప్రత్యేక స్థానాన్ని సంపాదించుకున్నాయి. భారీ గణపయ్యను నెమ్మదిగా, సురక్షితంగా నిమజ్జనానికి చేర్చే ఈ టస్కర్‌ ప్రయాణం కూడా ఉత్సవాల్లో ఒక ప్రత్యేక ఆకర్షణగా నిలుస్తోంది.